دینی مدارس میں بھی کھیلوں کے منصوبے شروع کرنے کا فیصلہ

Share on facebook
Share on google
Share on twitter
Share on linkedin

حکومت نے دینی مدارس میں بھی کھیلوں کے منصوبے شروع کرنے کا فیصلہ کیا ہے جس کے پہلے مرحلے میں جامعہ دارالعلوم حقانیہ نوشہرہ میں طلباء کے لیے بیڈمنٹن کورٹ کی تعمیر شروع کردی گئی ہے۔

خیبرپختونخوا حکومت نے صوبے میں کھیلوں کے فروغ اور کھلاڑیوں کو جدید سہولیات کی فراہمی کے لیے نئے مالی سال کے بجٹ میں خطیر فنڈز مختص کیے ہیں اس کے ساتھ ہی وزیراعلی خیبرپختونخوا کی ہدایت پر صوبے میں دینی مدارس کے طلباء کو بھی کھیلوں کی سرگرمیاں فراہم کرنے کا فیصلہ کیا ہے، جامعہ دارالعلوم حقانیہ نوشہرہ میں بیڈمنٹں کورٹ بنایا جارہاہے۔

محکمہ کھیل خیبر پختونخوا کی طرف بیڈمنٹن کورٹ کی تعمیر تیزی سے جاری ہے، اس حوالے سے سپورٹس ڈائریکٹریٹ کے ذرائع نے بتایا کہ صوبے میں دینی مدارس کے حوالے سے سروے کیا جارہا ہے اور دینی مدارس کے منتظمین کی مشاورت سے وہاں کھیلوں کی سہولیات مہیا کی جائیں گی۔

ڈی جی اسپورٹس اسفندیار خٹک کا کہنا ہے کہ حکومت کی کوشش ہے کہ پورے صوبے میں کھیلوں کی سہولیات فراہم کی جائیں، کھلاڑیوں کے ساتھ طلباء اور طالبات کو بھی کھیلوں کی سہولیات فراہم کررہے ہیں وزیراعلی محمود خان کی ہدایت پر دینی مدارس میں کھیلوں کی سہولیات کے مںصوبے شروع کیے جارہے ہیں، جامعہ دارالعلوم حقانیہ نوشہرہ میں بیڈمنٹن کورٹ کی تعمیر شروع کردی گئی ہے جس پر 93 لاکھ روپے لاگت آرہی ہے اور اسی طرح جس دارالعلوم میں جگہ کی گنجائش ہوگی وہاں سپورٹس ڈائریکٹریٹ کھیلوں کی سہولت فراہم کرے گی۔