گھر کی دہلیز پر منشیات فراہم کرنے والے گروہ کے تین ارکان گرفتار

Share on facebook
Share on google
Share on twitter
Share on linkedin

کیپٹل سٹی پولیس پشاور نے کامیاب کارروائیوں کے دوران اندرون شہر موبائل فون پر آرڈر حاصل کر کے گھر کی دہلیز پر منشیات فراہم کرنے والے منظم گروہ کا سراغ لگا کر تین ملزمان کو گرفتار کر لیا جن کے قبضے سے مجموعی طور پر 6 کلو گرام سے زائد چرس اور ہزاروں روپے مالیت کی آئس بھی برآمد کر لی گئی۔

پولیس کے مطابق گرفتار ملزمان کا تعلق پشاور کے مختلف علاقوں سے ہے جنہوں نے ابتدائی تفتیش کے دوران منشیات فروشی میں ملوث ہونے کا اعتراف کر لیا ہے، ملزمان کے خلاف مقدمات درج کرکے تفتیش شروع کر دی گئی۔

پولیس کا کہنا ہے کہ خفیہ اطلاعات پر مختلف کارروائیوں کے دوران اندرون شہر، سبزی منڈی، گھنٹہ گھر اور دیگر شہری علاقوں میں منشیات سپلائی کرنے والے منظم گروہ کا سراغ لگا کر تین ملزمان زبیع اللہ ولد رحمان خان سکنہ پیر بالا، آفتاب ولد اقبال سکنہ ہند کو دامان اور اسحاق ولد عمر گل سکنہ ولی آباد کو گرفتار کر لیا گیا۔

پولیس کے مطابق ملزمان نے ابتدائی تفتیش کے دوران منشیات کے مکروہ دھندے میں ملوث ہونے اور موبائل فون پر مخصوص گاہک سے آرڈر حاصل کر کے ان کو گھر کی دہلیز پر منشیات سپلائی کرنے کا اعتراف کر لیا ہے۔