باجوڑ کے قبائل کا زمرد کی کان اور غیر قانونی لیز پر احتجاج

Share on facebook
Share on google
Share on twitter
Share on linkedin

قبائلی ضلع باجوڑ کے علاقے آمان کوٹ برنگ کے پانچ قبائل کے مشران نے زمُرد کان کے غیر قانونی لیز اور این او سی کیلئے اپلائی کرنے کے خلاف احتجاجی مظاہرہ کرتے ہوئے لیز اور این او سی کینسل نہ کرنے کی صورت میں انسداد پولیو مہم سے بائیکاٹ کی دھمکی دے دی۔

اس سلسلے میں آمان کوٹ برنگ باجوڑ کے پانچ قوموں پائندہ خیل، طوری خیل، تاج بیگ خیل، بیر خیل اور شہزاد خیل کے مشران نے احتجاجی مظاہرہ اور مشترکہ پریس کانفرنس سے خطاب کیا۔

اس موقع پر خطاب کرتے ہوئے پانچ قوموں سے تعلق رکھنے والے سرکردہ مشران تاج محمد ، ذاکر زیب برنگ وال ، حاجی اصغر خان ، زر محمد ، مکرم خان ، آمیر خان اور سلطان خان نے کہا کہ مذکورہ اراضی جو کہ آدم خان اور مکرم خان کی ملکیت ہے اور اس زمرد کان میں ہم پانچ قوموں کی 20 کانیں ہیں لیکن اس کے باوجود بہادر شاہ نامی شخص نے قوم اور علاقے کے عوام کو اعتماد میں لئے بغیر 54 ایکڑ آراضی کی لیز اور این او سی لینے کے لئے اپلائی کیا ہے جس سے قوموں اور علاقے کے لوگوں میں شدید بے چینی اور غم و غصہ پایا جاتا ہے اور خون خرابے کا خدشہ بڑھ گیاہے اور کسی صورت فرد واحد کو زمرد کان کی لیز یا این او سی دینے کا فیصلہ قبول نہیں کریں گے۔

انہوں نے کہا کہ اس لیز اور این او سی کا مقامی ممبر قومی اسمبلی اور ممبر صوبائی اسمبلی کو بھی علم نہیں ہے۔

قومی مشران نے کہا کہ ہم کسی صورت امن و امان خراب نہیں کرنا چاہتے اور قانون کی مکمل پاسداری کرتے ہیں لیکن اپنے حق پر کسی کو قبضہ کرنے کی اجازت نہیں دیں گے۔

انہوں نے صوبائی ڈائریکٹر منرل خیبر پختونخواہ، ڈپٹی کمشنر باجوڑ سمیت وزیر اعلیٰ محمود خان، مقامی ایم این اے گل داد خان، ممبر صوبائی اسمبلی انجینئر اجمل خان اور دیگر حکام سے آمان کوٹ زمرد کان کی لیز اور این او سی لینے کے لئے اپلائی کا نوٹس لینے کا مطالبہ کیا اور کہا کہ فوری طور پر مذکورہ این او سی اور لیز کے لئے اپلائی کینسل کریں اور قوموں کو اعتماد میں لیکر انصاف پر مبنی کارروائی کی جائے۔

مشران نے متفقہ طور پر فیصلہ کیا کہ ہم کسی صورت فرد واحد کو این او سی اور لیز دینے کا فیصلہ قبول نہیں کریں گے اور اپنے حق حاصل کرنے کے لئے کسی بھی قربانی کے لئے تیار ہیں۔

انہوں نے کہا کہ ڈپٹی کمشنر باجوڑ نے ہمیں انصاف فراہم کرنے کا بھی وعدہ کیا ہے اس لئے ہم اُمید رکھتے ہیں کہ فرد واحد کو پورے علاقے کا لیز اور این او سی نہیں دیں گے اور قوموں کو اعتماد میں لیں گے۔