جمرود بائی پاس سڑک کی اراضی کا معاوضہ دیا جائے

Share on facebook
Share on google
Share on twitter
Share on linkedin

قبائلی ضلع خیبر کی تحصیل جمرود میں جمال خیل قبیلے کا ایک جرگہ منعقد ہوا جس میں مشران نے کثیر تعداد میں شرکت کی۔

جرگہ سے حاجی شیر بادشاہ، حاجی سعید خان، حاجی وزیر باز و دیگر نے خطاب کرتے ہوئے کہا کہ جمرود بائی پاس روڈ تعمیر کی مکمل حمایت کرتے ہیں تاہم ہمارا مطالبہ ہے کہ تعمیر سے پہلے جمال خیل قبیلے کے مشران و کشران کو اعتماد میں لے کر سڑک کی اراضی کا معاوضہ دیا جائے۔

انہوں نے کہا کہ پاس کلی ناکے کی اراضی اور کھیت جمال خیل قبیلے کی زمین ہے جس پر جمرود بائی پاس روڈ تعمیر کیا جا رہا ہے، پاس کلی ناکے اراضی پر ہمارے مشران کو قتل کیا گیا تھا اور اس اراضی کو مخالفین نے زبردستی چھینا تھا جس کے ثبوت مختلف کتابوں میں موجود ہیں۔

جرگہ نے منتخب نمائندگان سے بھی مایوسی کا اظہار کرتے ہوئے کہا کہ منتخب نمائندگان اور مشران اس مسئلے کو حل کرنے کے لیے آگے آئیں ورنہ اس مسئلے پر تصادم کا خطرہ ہوسکتا ہے۔