امریکا -طالبان معاہدے : پاکستان کو تقریب میں شرکت کی دعوت

Share on facebook
Share on google
Share on twitter
Share on linkedin

قطر نے پاکستان کو امریکا اور افغان طالبان کے درمیان امن معاہدے پر دستخط کی تقریب میں شرکت کی دعوت دے دی۔ امریکا اور افغان طالبان کے درمیان ممکنہ طور پر 29 فروری کو تاریخی امن معاہدہ خلیجی ملک قطر کے دارالحکومت دوحہ میں ہوگا، جس میں کئی ممالک اور عالمی تنظیموں کے نمائندے شرکت کریں گے۔

قطر نے باضابطہ طور پر پاکستان کو بھی امن معاہدے پر دستخط کی تقریب میں شرکت کی دعوت دے دی ہے۔

پاکستان میں قطر کے سفیر صقر بن مبارک نے وزیر خارجہ شاہ محمود قریشی سے دفتر خارجہ میں ملاقات کی اور انہیں 29 فروری کو دوحہ میں امریکا طالبان امن معاہدے پر دستخط کی تقریب میں شرکت کی دعوت دی۔

تقریب میں شرکت کی دعوت قطری ڈپٹی وزیراعظم اور وزیر خارجہ شیخ محمد بن عبد الرحمن الثانی کی جانب سے بھیجی گئی ہے، قطری سفیر نے شاہ محمود قریشی کو خصوصی دعوت نامہ پیش کیا۔

اس دوران وزیر خارجہ شاہ محمود قریشی کا کہنا تھا کہ پاکستان، امریکا اور طالبان کے امن معاہدے سے متعلق اعلان کا خیر مقدم کرتا ہے۔ انہوں نے کہا کہ پاکستان کا ہمیشہ سے مؤقف رہا ہے، افغان تنازعے کا کوئی فوجی حل نہیں، آج دنیا پاکستان کا مؤقف تسلیم کر رہی ہے۔

شاہ محمود قریشی کا کہنا تھا کہ افغان مفاہمتی عمل آگے بڑھانے میں پاکستان اور قطر کا کلیدی کردار ہے، امید ہے امن معاہدے پر دستخط بین الافغان مذاکرات کی طرف لے جائیں گے۔

خیال رہے کہ اِس وقت امریکا اور افغان طالبان کے درمیان 22 فروری سے اعتماد سازی کی بحالی کے لیے پرتشدد کارروائیاں روکنے کے وعدے پر عمل جاری ہے۔ امریکا نے ورلڈ ٹریڈ سینٹر پر حملے کے بعد 2001ء میں افغانستان پر چڑھائی کی تھی اور وہاں تقریباً 19 سال سے جنگ جاری ہے، جس میں لاکھوں افراد ہلاک اور زخمی ہوئے ہیں۔