ملک میں آٹے کا بحران، حکومت کا ہنگامی بنیادوں پراقدامات کا فیصلہ

Share on facebook
Share on google
Share on twitter
Share on linkedin

وفاقی حکومت نے ملک میں جاری آٹے کے بحران کے خاتمہ کیلئے گندم درآمد کرنے کے ضمن میں ہنگامی بنیادوں پر اقدامات مکمل کرنے کا فیصلہ کیا ہے۔

حکومت نے گندم کی درآمد کے لئے ہنگامی اقدامات شروع کردیئے ہیں، اقتصادی رابطہ کمیٹی کی جانب سے آج 3 لاکھ ٹن گندم کی درآمد کی منظوری ملتے ہی حکومت امپورٹ پرمٹ جاری کردے گی اورسٹیٹ بینک آف پاکستان تمام بینکوں کو امپورٹرز کیلیے لیٹر آف کریڈٹ (ایل سی) کیلیے ہدایات جاری کردے گا۔

گندم لے کرآنے والے بحری جہازوں کیلیے کیماڑی بندرگاہ پر جگہ مختص کروانے کیلیے بھی اقدامات کیے جائیں گے، گندم لیکر آنے والے پہلے جہازکے 17فروری تک پاکستان پہنچنے کا امکان ہے۔

روایتی طور پران تمام امور کو طے کرنے میں 15سے 20 دن لگتے ہیں لیکن ملک میں جاری آٹا بحران کی وجہ سے یہ تمام امور 48 گھنٹوں میں مکمل کیے جائیں گے۔

امپورٹرز کے مطابق اس وقت یوکرائن سے ہی جلد ازجلد گندم پاکستان لائی جا سکتی ہے، آسٹریلیا اور امریکہ سے گندم آنے میں 50دن سے زیادہ کا عرصہ درکار ہے جب کہ وہاں کی گندم 280 ڈالر میں ملے گی، یوکرائن والی گندم 250ڈالر میں خریدی جا سکتی ہے،پلانٹ پروٹیکشن ڈیپارٹمنٹ کو بھی ہدایت کی جائے گی کہ وہ امپورٹ ہو کر آنے والی گندم کی کلیئرنس ہنگامی طور پر کرے۔