پشاور میں ایک ماہ کیلئے دفعہ 144 نافذ کردی گئی

خیبر پختونخوا کے دارالحکومت پشاور میں محرم الحرام کے پیش نظر ایک ماہ کے لیے دفعہ 144 نافذ کردی گئی۔

ڈان نیوز کے مطابق پشاور میں محرم الحرام میں امن و امان کا قیام یقینی بنانے کے لیے ایک ماہ کے لیے دفعہ 144 نافذ کر دی گئی ہے جس کا ڈپٹی کمشنر پشاور نے حکم نامہ جاری کر دیا ہے۔

دفعہ 144 کے نفاذ کے دوران شہر میں گاڑیوں اور دکانوں کے سیاہ شیشوں، ہوائی فائرنگ اور اسلحے کی نمائش پر پابندی ہو گی۔

اسی طرح غیر مجاز افراد کی جانب سے گاڑیوں پر پولیس لائٹس کے استعمال کے ساتھ ساتھ غیر رجسٹرڈ گاڑیوں اور خود ساختہ نمبر پلیٹس والی گاڑیوں پر بھی پابندی عائد ہو گی۔

دفعہ 144 کے نفاذ کے دوران شہر میں موٹرسائیکل کی ڈبل سواری بھی بند ہوگی اور خلاف ورزی کی صورت میں تعزیرات پاکستان کی دفعہ 188 کے تحت کارروائی کی جائے گی۔