خیبرپختونخوا حکومت کا سبزیوں اور پھلوں کی آن لائن فروخت کا منصوبہ

Share on facebook
Share on google
Share on twitter
Share on linkedin

خیبرپختونخوا حکومت نے پھلوں اور سبزیوں کی آن لائن فروخت کیلئے ایک منفرد منصوبہ شروع کرنے کا اعلان کیا ہے جس کیلئے موبائل ایپ بھی تیار کرلیا گیا ہے اور اس کا افتتاح عنقریب کردیا جائے گا۔

ابتدائی طور پر اس ایپ سے پشاور، مردان، ایبٹ آباد اور ڈیرہ اسماعیل خان کے شہری مستفید ہوسکیں گے جسے بعد ازاں دیگر اضلاع تک وسعت دی جائے گی۔

خیبرپختونخوا حکومت نے مہنگائی کی روک تھام کیلئے انفارمیشن ٹیکنالوجی ڈپارٹمنٹ کے تعائون سے آن لائن خریداری کا منصوبہ بنایا ہے جس کا مقصد صارفین کو گھر کی دہلیز پر سرکاری نرخوں پر پھل اور سبزیاں فراہم کرنا ہے۔ رواں ماہ آن لائن سبزی اور پھلوں کی فروخت کیلئے ٹینڈر بھی جاری کردیا جائے گا۔

صوبائی حکومت کے ترجمان کا کہنا ہے آن لائن سبزی ایپ لانچ کرنے کے بعد خودساختہ مہنگائی کی روک تھام ممکن ہوسکے گی۔ انہوں نے کہا کہ پرائیویٹ کمپنیوں کے ساتھ معاہدہ بھی ہوگیا ہے کہ وہ سرکاری نرخوں پر منڈیوں سے سبزیاں اور پھل صارفین کے گھروں پرپہنچائیں گے۔