انتخابات کے حوالے سے قیاس آرائیوں سے گریز کرنا چاہیے: مرتضیٰ سولنگی

نگران وزیر اطلاعات مرتضیٰ سولنگی کا کہنا ہے کہ انتخابات کے حوالے سے قیاس آرائیوں سے گریز کرنا چاہیے۔

اسلام آباد میں پریس کانفرنس کرتے ہوئے مرتضیٰ سولنگی نے کہا کہ انتخابات کی کوریج کے لیے غیر ملکی میڈیا کے نمائندے پہلے ہی پاکستان میں ہیں، مبصرین اور غیرملکی صحافیوں کو 49 ویزے جاری کیے گئے.

انہوں نے کہا ہے کہ 32 درخواستوں پر ویزے دینے کا عمل جاری ہے، پاکستان ہائی کمیشن نئی دہلی سے تقریباً 24 اجازت ناموں کی درخواستیں پراسس میں ہیں، میڈیا کے مختلف اداروں کی طرف سے مجموعی طورپر 174 درخواستیں موصول ہوئی ہیں۔

مرتضیٰ سولنگی نے بتایا کہ غیر صحافی کیٹیگری میں صرف برطانیہ سے 25 درخواستیں پراسس میں ہیں، روس کی طرف سے 8،جاپان سے 13 اورکینیڈا سے 5 پارلیمنٹ کے ارکان نے درخواستیں دی ہیں۔

نگران وزیر اطلاعات نے مزید بتایا کہ کامن ویلتھ سے 5 درخواستیں پراسس میں ہیں، بین الاقوامی صحافی و مبصرکراچی،لاہور اور اسلام آباد کے لیے اجازت نامے لے رہے ہیں، ان 3 شہروں کے علاوہ اگرکوئی غیرملکی صحافی کسی دوسرے شہر جانا چاہے تو اس کا کیس ٹوکیس جائزہ لیں گے۔

ان کا کہنا تھا کہ 20 جنوری کی تاریخ گزرنے کے باوجود اب بھی درخواستوں کو دیکھ رہے ہیں،14 ممالک سے درخواستیں موصول ہوئی تھیں۔