انٹرنیشنل پولیس آرگنائزیشن کی اگلی بین الاقوامی کانگریس پاکستان میں منعقد کیے جانے کا اعلان

انٹرنیشنل پولیس آرگنائزیشن نے اٹلی کے شہر میلان میں منعقدہ انٹرنیشنل کانگریس میں اگلی بین الاقوامی کانگریس پاکستان میں منعقد کرنے کا اعلان کر دیا ہے۔

تفصیلات کے مطابق انٹرنیشنل پولیس آرگنائزیشن کی جانب سے اٹلی کے شہر میلان میں دوسری بین الاقوامی IPO کانگریس کا انعقاد کیا گیا، جس میں پاکستانی وفد سمیت دنیا بھر سے قانون نافذ کرنے والے حکام اور اراکین نے شرکت کی۔

آئی پی او پاکستان کے وفد نے صدر ڈی آئی جی ڈاکٹر مقصود احمد کی سربراہی میں کانگریس میں شرکت کی، جہاں انھوں نے منی لانڈرنگ اور دہشت گردی کی مالی معاونت کے شعبے میں اپنے تجربہ سے اراکین کو آگاہ کیا۔

ترجمان ڈی آئی جی سیکیورٹی اینڈ ایمرجنسی سروسز ڈویژن کے مطابق ڈاکٹر مقصود احمد نے ترقی پذیر ممالک میں جدید پولیسنگ کی اہمیت اور دنیا بھر کی پولیس تنظیموں کے درمیان مربوط تعلق استوار کرنے کے لیے ایجنسیوں کے مابین تعاون پر زور دیا۔

انٹرنیشنل پولیس آرگنائزیشن (IPO) 2022 سے اقوام متحدہ کے ECOSOC کے ساتھ خصوصی ادارے کی حیثیت سے ایک کثیر الاقوامی غیر منافع بخش اور غیر سرکاری تنظیم ہے۔

کانگریس میں شریک آئی پی او سیکشنز کے تمام لیڈروں اور ممبران کو جدید طرز پر اپنے خیالات اور تجربات کا تبادلہ کرنے کا موقع دیا گیا جب کہ شرکا کو مسقبل میں ہونے والے پروگراموں اور آئی پی او کے رہنما اصولوں کے بارے میں بھی آگاہ کیا گیا۔ آئی پی او کے صدر الجا زویٹک نے اگلی IPO کانگریس پاکستان میں منعقد کرنے کا اعلان کیا۔

اس موقع پر ڈی آئی جی سیکیورٹی ڈاکٹر مقصود احمد نے آئی پی او صدر کے فیصلے کا خیر مقدم کیا اور کہا کہ دنیا بھر سے آئے آئی پی او ممبران کی میزبانی کرنا پاکستان پولیس کے لیے قابلِ اعزاز ہوگا۔