محکمہ موسمیات نے خیبر پختونخوا میں گرمی کی لہر کی پیش گوئی کر دی

محکمہ موسمیات نے خیبر پختونخوا میں گرمی کی لہر کی پیش گوئی کر دی ہے۔

تفصیلات کے مطابق محکمہ موسمیات نے کہا ہے کہ خیبر پختونخوا میں 20 سے 24 جون تک گرمی کی لہر کا امکان ہے، بعض حصوں میں دوپہر اور رات کےاوقات میں تیز ہوائیں چلنے اور بارش کا بھی امکان ہے۔

محکمہ موسمیات کے مطابق خیبر پختون خوا کے بیش تر علاقوں میں منگل سے دن کے درجہ حرارت میں بتدریج اضافہ ہو سکتا ہے، اس سلسلے میں پی ڈی ایم اے نے ضلعی انتظامیہ اور متعلقہ اداروں کو ایک مراسلہ بھی جاری کر دیا ہے۔

پی ڈی ایم اے کے مراسلے میں کہا گیا ہے کہ دن کےاوقات میں درجہ حرارت میں 3 سے 5 سینٹی گریڈ اضافے کا امکان ہے، گرمی اور خشک موسمی حالات ہیٹ اسٹروک اور آبی ذخائر پر دباؤ کا سبب بن سکتے ہیں، اس لیے کسان فصلوں کے لیے پانی کا مناسب انتظام کریں۔

ڈجی جی پی ڈی ایم اے کی جانب سے یہ ہدایت بھی کی گئی ہے کہ عوام سورج کی روشنی میں باہر نکلتے ہوئے احتیاطی تدابیر اختیار کریں، بزرگ اور بچے صبح 10 سے شام 5 بجے تک براہ راست دھوپ میں نہ نکلیں۔