بنوں آپریشن کے بعد آرمی چیف کا وزیرستان اور ایس ایس جی ہیڈکوارٹر کا دورہ

بنوں آپریشن کے بعد سپہ سالار جنرل عاصم منیر نے وزیرستان اور ایس ایس جی ہیڈ کوارٹر کا دورہ کیا۔ ماہرین کا کہنا ہے کہ بنوں آپریشن میں دہشت گردوں کی بڑی تعداد کے مارے جانے کو کالعدم تحریک پاکستان اپنا بڑا نقصان سمجھ رہی ہے۔

عسکری ذرائع کے مطابق بنوں میں اہلکاروں کو یرغمال بنائے جانے کے بعد کیے گئے آپریشن کلین اپ کو تاریخ کے کامیاب ترین آپریشنز میں لکھا جائے گا، یہ آپریشن بہترین پیشہ وارانہ طریقے اور انتہائی صبر آزما مراحل میں مکمل کیا گیا اور فوج نے پیچیدہ ماحول یا کسی اور فیکٹر کا کوئی پریشر نہیں لیا۔

کامیاب آپریشن کے بعد آرمی چیف نے ایس ایس جی ہیڈکوارٹر اور وزیرستان کا دورہ کیا جس سے فوج، عوام اور دہشت گردوں سب کو انتہائی مضبوط پیغام گیا۔

اس دورے میں آرمی چیف نے واضح کیا کہ مسلح افواج دہشتگردوں کی طرف سے شروع کی گئی لڑائی کو دہشت گردوں کے گڑھ تک لے جائیں گی۔

آرمی چیف نے دہشت گردی کے گٹھ جوڑ کو حتمی طور پر توڑنے کا پیغام بھی دیا۔ آرمی چیف نے بنوں آپریشن کے ہیرو ایس ایس جی کمانڈوز کو ماتھے کا جھومر قرار دیا۔