خیبر پختونخواہ سے سینکڑوں دہشت گرد گرفتار

محکمہ انسداد دہشت گردی (سی ٹی ڈی) خیبر پختونخواہ نے سال 2022 میں سینکڑوں دہشت گرد گرفتار کر کے تخریب کاری کی درجنوں وارداتیں ناکام بنائیں۔

تفصیلات کے مطابق محکمہ انسداد دہشت گردی (سی ٹی ڈی) خیبر پختونخواہ نے سال 2022 کی سالانہ رپورٹ مرتب کرلی۔

رواں برس سی ٹی ڈی نے 768 دہشت گردوں کو گرفتار کیا، 90 دہشت گردوں کے سر پر انعام مقرر تھا۔

قبائلی علاقوں سمیت صوبے بھر میں 2 ہزار 597 آپریشنز کیے گئے جن میں انٹیلی جنس بیسڈ آپریشن بھی شامل ہیں، 19 سو 60 مشتبہ افراد کو بھی حراست میں لیا گیا، گرفتار دہشت گردوں میں 628 ہائی پروفائل مطلوب ملزمان بھی شامل ہیں۔

رپورٹ کے مطابق آپریشنز کے دوران 349 دستی بم، 80 ایس ایم جی گنز، 16 خودکش جیکٹس اور 7 راکٹ لانچرز اور دیگر بھاری اسلحہ برآمد کیا گیا۔

سی ٹی ڈی کی رپورٹ میں کہا گیا کہ رواں سال خیبر پختونخواہ پولیس کو 279 واقعات میں ٹارگٹ کیا گیا، رواں سال 116 پولیس جوان شہید جبکہ 125 زخمی ہوئے۔