سال 2021 میں غیر قانونی کرنسی ڈیلرز کے خلاف کتنی کارروائیاں ہوئیں؟

رواں برس 2021 میں حوالہ ہنڈی اور غیر قانونی کرنسی ڈیلرز کے خلاف ایف آئی اے پوری طرح متحرک رہا، اور سال بھر میں سینکڑوں مقدمات درج کیے گئے۔

تفصیلات کے مطابق آج ڈائریکٹر ایف آئی اے اسلام آباد وقار چوہان نے ہیڈ آفس میں پریس کانفرنس کی، جس میں انھوں نے سال بھر کی کارکردگی سے متعلق تفصیلات جاری کیں۔

.انھوں نے کہا حوالہ ہنڈی پر 460 افراد کے خلاف، کرپشن پر 63 افراد اور دیگر جرائم پر 164 افراد کے خلاف میوچل لیگل اسٹنٹس کی درخواستیں بھیجی گئیں۔

وقار چوہان نے بتایا کہ فنانشل کرائم میں ملوث 14 کمپنیوں کے خلاف منی لانڈرنگ کے تحت پرچہ درج کیا گیا، اور منی لانڈرنگ ایکٹ کے تحت 77 افراد کے خلاف انفرادی طور پر بھی کیسز رجسٹرڈ کیے گئے ہیں۔

ایف آئی اے نے غیر قانونی کرنسی ڈیلرز کے خلاف بھی کارروائیاں شروع کر دی ہیں، یکم دسمبر سے 28 سمبر تک 95 غیر قانونی کرنسی ڈیلرز کے خلاف مقدمات درج کیے گئے اور لاکھوں روپے برآمد کیے گئے۔

ڈائریکٹر وقار چوہان کے مطابق یکم جنوری سے اب تک ایف آئی نے غیر قانونی کرنسی کے خلاف 335 مقدمات درج کیے ہیں اور 1273 ملین کی ریکوری کی گئی۔