افغانستان صورتحال: سول اور عسکری قیادت کا اہم اجلاس طلب

Share on facebook
Share on pinterest
Share on twitter
Share on linkedin
Share on whatsapp

 افغانستان پرسول اورعسکری حکام کا اہم اجلاس آج وزارت خارجہ میں ہوگا۔

ذرائع کے مطابق اجلاس کی صدارت وزیرخارجہ شاہ محمود قریشی کریں گے، وزیرداخلہ شیخ رشید وزیر دفاع پرویز خٹک،وزیر اطلاعات فواد چوہدری خصوصی اجلاس میں شرکت کریں گے جبکہ قومی سلامتی کےمشیربھی اجلاس میں شریک ہوں گے۔

ذرائع کا کہنا ہے کہ اجلاس میں افغانستان کی صورتحال پرتبادلہ خیال کیا جائیگا،اجلاس میں اہم فیصلےبھی کیےجانےکاامکان ہے۔

واضح رہے کہ افغانستان میں امن و امان کی بگڑتی ہوئی صورتحال کے باعث پاکستان میں تشویش بڑھتی جارہی ہے، ایک طویل جنگ جو خانہ جنگی کی جانب بڑھ رہی ہے پاکستان کے لیے کئی چیلنجز کا باعث بنے گی۔

پاکستان کی سیکیورٹی صورتحال کا افغانستان سے براہِ راست تعلق ہوتا ہے،پڑوسی ملک میں جاری کشیدگی پاکستان کو دوبارہ ان خطرات سے دوچار کردے گی جس سے نمٹنے کے لیے پاکستان نے بھاری جانی نقصان اٹھایا اور شدید معاشی اور سماجی اثرات برداشت کیے۔

چار دہائیوں سے زائد عرصے تک پاکستان نے افغانستان میں جاری لڑائی اور غیر ملکی فوجی مداخلت کی قیمت اٹھائی ہے جس کا براہِ راست اثر پاکستان کی سلامتی، استحکام اور معاشی ترقی پر ہوا۔

یہ اثرات سب کو معلوم ہیں اور انہیں یہاں دہرانا ضروری نہیں ہے جبکہ مغربی سرحد پر مزید کشیدگی کا مطلب یہ ہوگا کہ ملک کو بیک وقت ان اندرونی، علاقائی اور بین الاقوامی چیلنجوں سے نمٹنا پڑے گا جو اس کشیدگی کے نتیجے میں پیدا ہوں گے۔