خیبر کے طلباء کالج میں داخلہ لینے سے محروم

Share on facebook
Share on google
Share on twitter
Share on linkedin

ضلع خیبرسے تعلق رکھنے والے 1600 طلباء جنہوں نے اس سال میٹرک پاس کیا ہے کالج میں داخلہ لینے سے محروم ہیں۔

مقامی ذرائع کے مطابق اس سال باڑہ ڈویژن کے 1932 طلباء نے میٹرک پاس کیا ہے جن میں صرف 260 کو کوہی شیرحیدر کالج میں داخلہ ملا ہے اور باقی 1600 طلباء داخلے سے محروم ہیں کیونکہ پشاور کے کالجوں میں بھی باڑہ کے طلباء کےلئے لوکل اور نان لوکل کا مسئلہ بنا ہوا ہے۔

اس سلسلے میں خیبر سٹوڈنٹس یونین کے مشران اور سینکڑوں طلباء نے باڑہ پریس کلب کے سامنے ایک احتجاجی کیمپ لگایا ہے۔

احتجاجی کیمپ میں شریک طلباء کا کہنا ہے کہ کوہی شیر حیدر کالج کے مسائل حل کرنے کےلئے ہرحد تک گئے لیکن کوئی شنوائی نہ ہو سکی اور مجبور ہوکراحتجاجی کمپ لگانے کا فیصلہ کیا ہے۔

انہوں نے صوبائی وزیر تعلیم سے ہنگامی بنیادوں پر مطالبہ کیا ہے کہ گورنمنٹ ہائی سکول شلوبر ، میلواٹ ، عالم گودر اور جعفرکلے ہائی سکولوں کو ہائرسیکنڈری کا درجہ دیا جائے۔ انہوں نے یہ مطالبہ بھی کیا ہے کہ کوہی شیرحیدر کالج میں سیکنڈشفٹ کی کلاسز شروع کی جائے۔

طلباء نے دھمکی دی کہ اگر طلباء کو داخلہ نہ دیا گیا تو پرتشدد مظاہروں اور متحدہ طلباء محاذ بنائینگے۔

اس موقع پر خیبر یونین اور خیبر سٹوڈنٹس یونین کے مشران زاہد اللہ ، حارث خان ، گل نذیر ، بصیر افریدی اور عارف افریدی بھی موجود تھے۔